Curabitur ut dui lacus. Pellentesque habitant morbi tristique senectus et netus et malesuada.
Curabitur ut dui lacus. Pellentesque habitant morbi tristique senectus et netus et malesuada.
Enter Slide Title Here
Curabitur ut dui lacus. Pellentesque habitant morbi tristique senectus et netus et malesuada.
Enter Slide Title Here
Curabitur ut dui lacus. Pellentesque habitant morbi tristique senectus et netus et malesuada.
Curabitur ut dui lacus. Pellentesque habitant morbi tristique senectus et netus et malesuada.
Enter Slide Title Here
Curabitur ut dui lacus. Pellentesque habitant morbi tristique senectus et netus et malesuada.
తెలంగాణ రాష్ట్రంలో పుట్టిన బిడ్డల కోసం ఒక కొత్త పథకాన్ని ప్రభుత్వం ప్రవేశపెట్టనుంది. తెలంగాణ శిశు ఆధార్ పేరుతో రూపొందించిన ఈ కొత్త పథకం ద్వారా పుట్టిన ప్రతిబిడ్డకు 20 నిమిషాల్లోనే ఆధార్ కార్డు, జనన ధ్రువీకరణ పత్రాలు ఇచ్చేందుకు ప్రభుత్వం సిద్ధమవుతోంది. జనన ధ్రువీకరణ పత్రం ఇచ్చే అధికారాన్ని ప్రసూతి ఆసుపత్రి సూపరింటెండెంట్ కే కల్పించనున్నారు. ఈ పథకాన్ని హైదరాబాద్ లోని నయాపూల్ ప్రసూతి ఆసుపత్రిలో ప్రయోగాత్మకంగా వారం రోజులు అమలు చేస్తారు. జులై 15 నాటికి పేట్ల బురుజు, కోఠి ఆసుపత్రి, నిలోఫర్, గాంధీ, ఉస్మానియా ఆసుపత్రుల్లో అమలు కానుంది. జీహెచ్ ఎంసీ, తెలంగాణ ఐటీ శాఖ, ఆధార్ ప్రాంతీయ కార్యాలయం సంయుక్త నిర్వహణలో ఈ ప్రాజెక్టును అమలు చేస్తారు. దశలవారీగా ప్రభుత్వ, ప్రైవేటు ఆసుపత్రుల్లోనూ ఈ పథకాన్ని అమలు చేయనున్నట్లు సమాచారం
Rating: 2.75/5 అంజిరెడ్డి ప్రొడక్షన్స్ పతాకంపై భోగాది అంజిరెడ్డి నిర్మాతగా రాజసింహ తాడినాడని దర్శకుడిగా పరిచయం చేస్తూ చేసిన రొమాంటిక్ థ్రిల్లర్ ’ఒక్క అమ్మాయి తప్ప’. సందీప్ కిషన్ హీరోగా నటించిన ఈ సినిమాలో నిత్యామీనన్ హీరోయిన్గా నటించింది. ట్రాఫిక్ జామ్ నేపథ్యంలో, ఓ ఫ్లై ఓవర్పై నడిచే కథ కావడంతో ’ఒక్క అమ్మాయి తప్ప’పై మొదట్నుంచీ మంచి అంచనాలు ఉన్నాయి. మరి సినిమా ఆ అంచనాలను అందుకునేలానే ఉందా? చూద్దాం...
కథ :
జైల్లో ఉన్న టెర్రరిస్ట్ అస్లాం (రాహుల్ దేవ్)ని విడిపించడానికి ఓ టెర్రరిస్ట్ గ్రూప్ హెడ్ అయిన అన్వర్ (రవికిషన్) హైదరాబాద్ లో ఉన్న హైటెక్ సిటీ ఫ్లై ఓవర్ పై ట్రాఫిక్ జామ్ క్రియేట్ చేసి ఫ్లై ఓవర్ ని బాంబులతో పేల్చివేస్తామని ప్రభుత్వాన్ని బెదిరించాలని ప్లాన్ చేస్తాడు. ఇది ఇలా ఉండగా రమ్మీ ఆడటంలో ఎక్స్పర్ట్ అయిన కృష్ణ వచన్ (సందీప్ కిషన్) అనుకోకుండా హైటెక్ సిటీ ఫ్లై ఓవర్ పై ట్రాఫిక్ జామ్ లో మ్యాంగో (నిత్యామీనన్) ని కలుస్తాడు. తనే తన చిన్నప్పటి స్నేహితురాలు మ్యాంగో అని తెలుసుకుంటాడు. ఫ్లై ఓవర్పై ట్రాఫిక్ జామ్ లో ఇరుక్కున్న హీరోకి ఓ అగంతకుడి దగ్గర నుంచి ఓ ఫోన్ కాల్ వస్తుంది. ఆ ఫోన్ ఎవరు చేశారు? ఎందుకు చేశారు? హీరోకి, ఈ టెర్రరిస్ట్ గ్రూప్ కి సంబంధం ఏంటి? టెర్రరిస్ట్ అస్లాం జైలు నుంచి విడుదల అయ్యాడా? అసలు చివరికి ఏం జరిగింది? అన్నది మిగతా కథ
ప్లస్ పాయింట్స్ :
సందీప్ కిషన్ నటన ఈ సినిమాకి ప్లస్ పాయింట్ గా చెప్పుకోవచ్చు. రొమాంటిక్ సన్నివేశాలతో పాటు సీరియస్ సన్నివేశాల్లో కూడా సందీప్ నటన ఆకట్టుకుంటుంది. మంచి ప్రతిభ గల నటిగా పేరుతెచ్చుకున్న నిత్యామీనన్ మ్యాంగో పాత్రలో ఈ సినిమాకి మరో ప్లస్ పాయింట్గా నిలిచింది. నిత్యామీనన్ ది చెప్పుకోదగిన పాత్ర కాకపోయినా, తన నటనతో ఆకట్టుకుంది.
స్నేహం, ప్రేమ, టెర్రరిజం ఇలా మూడు అంశాలను ఒక ఫార్ములా కథకు కలిపి చెప్పడం బాగా ఆకట్టుకునే అంశం. ఇక సెకండాఫ్ లోనే అసలైన కథ మొదలవడంతో సినిమా ఆసక్తికలిగిస్తుంది. ప్రీ క్లైమాక్స్ నుంచీ చివరి ముప్పయి నిముషాలు ఈ సినిమా బాగా ఆకట్టుకుంటుంది.
మైనస్ పాయింట్స్ :
సెకండాఫ్ లో వచ్చే యాక్షన్ ఎపిసోడ్స్ ఆకట్టుకునే స్థాయిలో లేవు. హీరో, హీరోయిన్ల చిన్నప్పటి లవ్ ట్రాక్ ఎటువంటి ఎమోషన్ కలిగించకపోవడంతో పాటు విసిగిస్తుంది కూడా. ఆలీ పాత్రలో చేసిన కామెడీ ఏమాత్రం ఆకట్టుకోదు. రవి కిషన్ లౌడ్ యాక్టింగ్తో విసిగించాడు. అలాగే సెకండాఫ్ లో ఎంటర్టైన్మెంట్ తగ్గడంతో పాటు సినిమాని అక్కడక్కడా సాగదీశారు. ఇక ఈ సినిమాకు మైనస్ పాయింట్ ఏమిటంటే దర్శకుడు కొత్త థ్రిల్లర్ లైన్ అనుకున్నా, రెగ్యులర్ ఫార్ములా లాగా ప్రేమకథ చుట్టూనే ఎక్కువసేపు కథను నడపడం.
అలాగే కథాంశం బలమైనదే అయినా కొత్తది కాదు. అంతేకాకుండా కథ విషయంలో ఎప్పుడూ కొత్తదనం కోరుకునేవారికి, రెగ్యులర్ కథలను పెద్దగా ఇష్టపడని వారికి కూడా ఈ కథలో తాము కోరుకునే అంశాలు తక్కువ. అంతేకాకుండా ఈ సినిమాలో కామెడీ లేకపోవడం, ఉన్న కామెడీ కూడా పండకపోవడం ఈ సినిమాకి మైనస్ గా మారింది. ఇక ఈ సినిమాలో చాలా చోట్ల లాజిక్ ని పూర్తిగా వదిలేసారు. టైటిల్ కూడా తప్పుదారిపట్టించేలా ఉండటం మరో పెద్ద మైనస్ అని చెప్పవచ్చు. సాంకేతిక విభాగం :
సాంకేతిక అంశాల విషయానికి వస్తే.. ముందుగా నూతన దర్శకుడు రాజసింహ తాడినాడ ఓ వైవిధ్యమైన కథనే రాసుకుని స్నేహం, ప్రేమ, టెర్రరిజం చుట్టూ నడిపించే ప్రయత్నం చేశారు. కానీ పూర్తి స్థాయిలో సఫలం కాలేకపోయాడు. కథ సింపుల్ పాయింట్ కావడంతో స్క్రీన్ ప్లే చాలా తెలివిగా, ఆసక్తికలిగించే విధంగా రాసుకోవాల్సింది. ప్రధమార్థంలో విసిగించిన దర్శకుడు ద్వితీయార్థంలో మాత్రం ఫర్వాలేదనిపిస్తాడు. ప్రీ క్లైమాక్స్కి వచ్చేసరికి మాత్రం రచయితగా, దర్శకుడిగా రాజసింహ మంచి ప్రతిభ చూపాడు.
సినిమాటోగ్రఫీ చాలా బాగుంది. సినిమాలో ప్రతి ఫ్రేం చూడటానికి చాలా కలర్ఫుల్ గా ఉండేలా సీనియర్ సినిమాటోగ్రాఫర్ చోటా కె నాయుడు జాగ్రత్తలు తీసుకున్నాడు. ’ఎగిరెనే ఎగిరెనే…’ పాటలో వచ్చే విజువల్స్ ఆకట్టుకుంటాయి. అంతేకాకుండా రాత్రి ఎఫెక్ట్ లో తీసిన సన్నివేశాలకు ఇచ్చిన లైటింగ్ బావుంది. గ్రాఫిక్స్ కొద్దిచోట్ల ఫరవాలేదనిపించినా ఎక్కువగా తేలిపోయాయి. మిక్కీ జే మేయర్ అందించిన పాటలు బాగున్నాయి. కథకు తగ్గట్టుగా మంచి నేపథ్య సంగీతం అందించాడు. ఇక నిర్మాణ విలువలు బాగున్నాయి.
ADD
తీర్పు :
మొదట్నుంచీ ప్రచారం పొందినట్లుగానే ‘ఒక్క అమ్మాయి తప్ప’ సినిమాకు ఉన్నంతలో కథే బలం. అయితే ఆ కథను పూర్తి స్థాయి సినిమాగా మలచడంలో తప్పటడుగులు వేయడంతో ఈ సినిమా మంచి థ్రిల్లర్గా నిలవలేకపోయింది. సందీప్ కిషన్, నిత్యా మీనన్ల నటన, కొత్తగా కనిపించే కథ, సినిమాటోగ్రాఫర్ చోటా కే నాయుడు పనితనం, ఫర్వాలేదనిపించే క్లైమాక్స్ లాంటి అనుకూలాంశాలతో వచ్చిన ఈ సినిమాలో కథనం బాగోలేకపోవడం, ప్రేక్షకుడిని కట్టిపడేసే సన్నివేశాలు ఎక్కడా లేకపోవడం, ఎంటర్టైనింగ్ అంశాలు కూడా లేకపోవడం లాంటివి ప్రతికూలాంశాలు. ఒక్క మాటలో చెప్పాలంటే.. ఎటువంటి అంచనాలు లేకుండా, కొత్త ప్రయత్నమేదో చేస్తే చూద్దామనుకునే ప్రేక్షకులకు ఈ సినిమా నచ్చుతుంది. ---రివ్యూ బై విజ్ఞాన్ దాసరి
Rating: 2.75/5 ‘అంతకుముందు ఆ తరువాత’, ‘లవర్స్’, ‘కేరింత’ సినిమాలతో మంచి విజయాలను అందుకున్న హీరో సుమంత్ అశ్విన్, తెలుగు సినీ పరిశ్రమలో తనకంటూ ఓ గుర్తింపు తెచ్చుకునే దిశగా అడుగులేస్తున్నారు. తాజాగా ఆయన హీరోగా నటించగా, కాళకేయ ప్రభాకర్ మరో ప్రధాన పాత్రలో నటించిన సినిమా ‘రైట్ రైట్’. మను దర్శకుడిగా పరిచయమవుతూ తెరకెక్కించిన ఈ సినిమా నేడు ప్రేక్షకుల ముందుకు వచ్చింది. మళయాలంలో మంచి విజయం సాధించిన ‘ఆర్డినరీ’ అనే సినిమాకు రీమేక్గా తెరకెక్కిన ‘రైట్ రైట్’, ఎంతమేరకు ఆకట్టుకుందీ? చూద్దాం...
కథ :
రవి (సుమంత్ అశ్విన్) ఓ మధ్యతరగతి కుటుంబంలో పుట్టి, పెరిగిన యువకుడు. కుటుంబ బాధ్యతలన్నీ తనే మోయాల్సిన పరిస్థితుల్లో, రవి, పెద్దగా ఇష్టం లేకున్నా ఆర్టీసీలో బస్ కండక్టర్గా ఉద్యోగంలో చేరతాడు. ఎస్. కోట నుంచి గవిటి అనే ఓ చిన్న ఊరికి వెళ్ళే ఒకే ఒక్క బస్సుకి రవి, డ్రైవర్ శేషు (ప్రభాకర్) విధులు నిర్వహిస్తుంటారు. గవిటి ఊర్లో వీరిద్దరికీ అందరి దగ్గర్నుంచీ మంచి ఆదరణ ఉంటుంది. రవి ఆ ఊరి వాళ్ళతో, శేషుతో బాగా కలిసిపోతాడు. అంతా బాగున్న ఈ క్రమంలోనే రవి, శేషుల వల్ల ఓ ప్రమాదం జరుగుతుంది.
ఆ ప్రమాదంతో వారి జీవితాలు అనుకోని మలుపులు తిరుగుతాయి. రవి, శేషుల వల్ల జరిగిన ప్రమాదం ఏంటీ? తను ప్రేమించిన అమ్మాయి కళ్యాణి (పూజా జవేరి) రవికి దక్కుతుందా? ఒక్కసారే వచ్చిపడ్డ ఈ కష్టాలను రవి ఎలా ఎదుర్కున్నాడూ? లాంటి ప్రశ్నలకు సమాధానమే ఈ సినిమా.
ప్లస్ పాయింట్స్ :
‘రైట్ రైట్’కు మేజర్ ప్లస్ పాయింట్ అంటే.. సినిమాలో వచ్చే ప్రధాన పాత్రలన్నింటికీ కథతో ఏదో ఒక విధంగా ఓ కనెక్షన్ ఉండడం, ఈ పాత్రలన్నీ కథా గమనానికి బాగా ఉపయోగపడడం గురించే చెప్పుకోవాలి. సుమంత్ అశ్విన్, ప్రభాకర్, పావని, నాజర్, భద్ర.. ఇలా ప్రధాన పాత్రలన్నింటికీ ఓ కథ ఉండటంతో పాటు అవన్నీ అసలు కథకు కనెక్ట్ అయి ఉన్న విధానం కూడా చాలా బాగుంది. ఇక సుమంత్-ప్రభాకర్ల మధ్యన వచ్చే సన్నివేశాలు సరదాగా బాగున్నాయి. ఇంటర్వెల్ బ్లాక్ సినిమాకు ఓ హైలైట్గా చెప్పుకోవాలి. సినిమా అసలు కథలోకి వెళ్ళే నేపథ్యం నుంచి వచ్చే ఈ ట్విస్ట్, మేకింగ్ పరంగానూ బాగుంది.
ఇక సుమంత్ అశ్విన్ తనకు అలవాటైన పాత్రే చేసినా, ఆ పాత్రలో చాలా బాగా నటించాడు. పాత్ర పరిధులు దాటకుండా సుమంత్ తన శక్తిమేర బాగా చేశాడు. ఇక ప్రభాకర్ తన కెరీర్లో ఇలాంటి పాత్రల్లో చాలా తక్కువగా కనిపించాడు. పూర్తిగా నెగటివ్ పాత్రలనే చేయగలడన్న పేరేదైనా ప్రభాకర్పై ఉంటే ఈ సినిమాతో దాన్ని పోగొట్టేలా చేశాడు. తన పాత్రతో అందరూ కనెక్ట్ అయ్యేలా ప్రభాకర్ బాగా నటించాడు. ఇక నాజర్ ఎప్పట్లానే తన స్థాయికి తగ్గ నటనతో మెప్పించారు. పావని గంగిరెడ్డి తన పాత్రలో ఒదిగిపోయింది. ఇక హీరోయిన్గా పూజా జవేరికి చెప్పుకోదగ్గ సన్నివేశాలేవీ లేకపోయినా, ఉన్నంతలో బాగా చేసింది. భద్ర అనే పాత్రలో నటించిన వినోద్ కిషన్ గురించి ప్రత్యేకంగా ప్రస్తావించుకోదగ్గ రీతిలో నటించాడు.
సినిమా పరంగా చూసుకుంటే సెకండాఫ్ని ఈ సినిమాకు హైలైట్గా చెప్పుకోవచ్చు. అసలు కథతో పాటు, ట్విస్ట్లన్నీ ఈ భాగంలోనే ఉండడంతో సెకండాఫ్ క్లైమాక్స్కు ముందు వరకూ బాగా ఆకట్టుకుంది.
మైనస్ పాయింట్స్ :
ఈ సినిమాకు మేజర్ మైనస్ పాయింట్ అంటే, అసలు కథతో పాటు చుట్టూ ఉండే పరిస్థితులు, ఆలోచనలు.. అన్నీ 80,90వ దశకంలో వచ్చిన సినిమాలను తలపించడం గురించే చెప్పుకోవాలి. కథేమో నేటితరంలో నడుస్తూ, చుట్టూ ఉన్న పరిస్థితులు, ఆలోచనలేమో పాతతరంలా కనిపిస్తూ రెండింటికీ కనెక్షన్ కుదరక సినిమా అసహజంగా కనిపిస్తుంది. ఇక సెకండాఫ్ మొదలయ్యే వరకూ అసలు కథలోకి తీసుకెళ్ళకుండా, అప్పటివరకూ కట్టిపడేసే సన్నివేశాలేవీ పెట్టకుండా ఫస్టాఫ్ మొత్తం కాలక్షేపంలా గడిపేయ్యడం ఆకట్టుకోలేదు.
అదేవిధంగా సెకండాఫ్లో ట్విస్ట్లతో ఆకట్టుకున్నా, క్లైమాక్స్ దగ్గరకు వచ్చేసరికి సినిమా పూర్తిగా మెలోడ్రామాగా మారిపోయింది. ఈ సన్నివేశాల్లో భావోద్వేగం కనెక్ట్ అవ్వకపోగా, కాస్త అతిగా కూడా కనిపించింది. ఇక ఒక మిస్టరీ చుట్టూ తిరిగే సెకండాఫ్లో ఆ మిస్టరీ వెనుక ఉన్న కారణం కూడా మరీ బలమైనది కాకపోవడం కూడా మైనస్సే!
సాంకేతిక విభాగం :
సాంకేతిక అంశాల పరంగా చూస్తే, ‘రైట్ రైట్’ ఓ చిన్న సినిమా అన్న ఆలోచన తెప్పించదు. ముఖ్యంగా శేఖర్ వి జోసఫ్ సినిమాటోగ్రఫీ గురించి ఎంత చెప్పినా తక్కువే! సినిమా మూడ్ను ఎక్కడా దారితప్పించకుండా, లొకేషన్స్ని సరిగ్గా వాడుకుంటూ ఓ మంచి ఫీల్ తెచ్చారు. ఇంటర్వెల్ బ్లాక్ని శేఖర్ పనితనానికి ఓ నిదర్శనంగా చెప్పుకోవచ్చు. ఇక జేబీ అందించిన మ్యూజిక్ ఫర్వాలేదు. సందర్భానుసారంగా వచ్చే పాటలన్నీ విజువల్స్తో కలిపి చూసినప్పుడు బాగున్నాయి. ఉద్ధవ్ ఎడిటింగ్ గురించి చెప్పుకోవడానికి ఏమీ లేదు.
ADD
ఇక ఈ సినిమాతో దర్శకుడిగా పరిచయమైన మను పూర్తి స్థాయిలో ప్రతిభ చూపడంలో విఫలమయ్యాడనే చెప్పుకోవాలి. మళయాలంలో ఆకట్టుకున్న కథను, ఇక్కడి నేపథ్యానికి తగ్గట్టుగా బాగానే మార్చుకున్నా, ఆ కథను పాతతరం పరిస్థితులు, ఆలోచనల చుట్టూ చెప్పడమే మను చేసిన తప్పుగా కనిపిస్తుంది. దర్శకుడిగా మాత్రం కొన్నిచోట్ల మను మంచి ప్రతిభే చూపాడు. ముఖ్యంగా ఇంటర్వెల్ బ్లాక్, ప్రీ క్లైమాక్స్లో ట్విస్ట్ బయటపడే విధానం.. ఇలాంటి సన్నివేశాల్లో మను మేకింగ్ పరంగా ఫర్వాలేదనిపించాడు.
తీర్పు :
తెలుగు సినీ పరిశ్రమలో ప్రస్తుతం ఉన్న హీరోలు, సినిమాలు, వాటి బాక్సాఫీస్ పరిస్థితులు.. ఇవన్నీ చూసినతర్వాత కొత్తగా ఒక హీరో తనదైన గుర్తింపు తెచ్చుకోవాలంటే ఎప్పటికప్పుడు కొత్తగా ఏదోకటి ప్రయత్నిస్తూనే ఉండాలి. హీరోగా ఇప్పుడిప్పుడే ఎదుగుతోన్న సుమంత్ అశ్విన్ కూడా ఈ క్రమంలోనే తనకున్న ఇమేజ్ను పక్కనబెట్టి ఓ సాదాసీదా పాత్రలో కనిపిస్తూ, ‘రైట్ రైట్’ అనే సినిమాతో మనముందుకు వచ్చాడు. ‘రైట్ రైట్’ అసలు కథ ఎప్పుడు చెప్పినా బాగుండేదే! అయితే ఆ కథను చెప్పిన విధానంలోనే ఈ సినిమా తడబడింది. సుమంత్ అశ్విన్, ప్రభాకర్, నాజర్, పావని తదితరుల పాత్రలూ, ఆ పాత్రల్లో వారి నటన, మేకింగ్ పరంగా ఆకట్టుకునే ఇంటర్వెల్, సెకండాఫ్లో వచ్చే కొన్ని ట్విస్ట్స్ ఈ సినిమాకు ప్లస్ పాయింట్స్. ఇకపోతే పైనే చెప్పినట్టు, కథ పాతతరం ఆలోచనల చుట్టూ తిరగడం, అతిగా కనిపించే క్లైమాక్స్, ఫస్టాఫ్లో పెద్దగా కట్టిపడేసే స్థాయి సన్నివేశాలేవీ లేకపోవడం ఈ సినిమాకు మైనస్ పాయింట్స్. ఒక్కమాటలో చెప్పాలంటే.. మెలోడ్రామా ఎక్కువై ‘రైట్ రైట్’ కాస్త పక్కదారి పట్టింది!!
ఆడియో వేదికపై యాంకర్ ఝాన్సిని ఘోరంగా అవమానించిన దాసరి, మంత్రి రసమై బాలక్రిష్ణ...
యాంకర్ ఝాన్సిని ఘోరంగా అవమానించిన దాసరి, మంత్రి రసమై బాలక్రిష్ణ...
మంత్రి రసమై బాలక్రిష్ణ ఆడియో వేదిక మీద, అదీ దాసరి, సి.కళ్యాణ్, భీమనేని లాంటి వాళ్ల ముందు, యాంకర్ ఝాన్సి గురించి అసభ్యంగా మాట్లాడారు. "అమ్మా నిన్ను నేను చిన్నపటినుండి చూస్తున్న, నా ఆరొ తరగతి నుండి అలానే ఉన్నావు" అని అన్నారు.
ఇక దాసరి గారు ఆడియొ వేదికపై, సినిమా ప్రచారాలపై గురించి దుమ్ము దులిపేసారు. "ట్రైలర్స్, ఆడియొ ఫంక్షన్స్ చేసి సినిమా మీద ఇంట్రస్ట్ పాడుచెయకండి. రిలీజ్ కి ముందు ట్రైలర్స్ లో సినేమా మొత్తం చూపిస్తూ, ట్విస్టులు చూపించేస్తూ ఇంట్రస్ట్ తగ్గించేస్తున్నారు. మారొజుల్లొ హీరో, హీరొయిన్ల పోస్టర్లు తప్ప, థియేటర్ కి వచ్చేవరకు ఏమీ తెలిసేది కాదు. అందుకె జనాలు థియేటర్ కి వచేవాళ్ళు, నాలుగు డబ్బులు వచేవి. ఇప్పుడు చిన్న సినిమాలు అందుకే సక్సస్ కాలేకపొతున్నాయి".
‘సూపర్స్టార్’ కృష్ణ.. తెలుగు సినీ ప్రపంచానికి పరిచయం అక్కర్లేని పేరు. నటుడిగా, నిర్మాతగా, దర్శకుడిగా, స్టూడియో అధినేతగా ఇలా చేపట్టిన అన్ని బాధ్యతలనూ సమర్ధవంతంగా నిర్వహించి తనకంటూ ఒక గొప్ప గుర్తింపు తెచ్చుకున్న కృష్ణ వారసత్వం ఈతరం సూపర్ స్టార్గా అవతరించిన మహేష్ ద్వారా కొనసాగుతూనే ఉంది. కొద్దికాలంగా నటనకు దూరంగా ఉంటూ వచ్చిన కృష్ణ, మళ్ళీ ఇన్నాళ్ళకు తన అభిమానులను అలరించేందుకు ‘శ్రీ శ్రీ’ అనే సినిమాతో నేడు ప్రేక్షకుల ముందుకు వచ్చారు. గతంలో ‘సంక్రాంతి’, ‘రాజా’ లాంటి సూపర్ హిట్ సినిమాలను తెరకెక్కించిన దర్శకుడు ముప్పలనేని శివ ఈ సినిమాకు దర్శకత్వం వహించారు. పగ తీర్చుకోవడం అనే కాన్సెప్ట్ ఎప్పటికీ పాతది కాదు అన్న ట్యాగ్తో వచ్చిన ఈ సినిమా ఎలా ఉందీ? చూద్దాం…
కథ :
శ్రీ శ్రీ (కృష్ణ) తన భార్య(విజయ నిర్మల) కూతురు శ్వేతలతో సంతోషకరమైన జీవితం గడిపే ఓ ప్రొఫెసర్. ఓ ప్రముఖ న్యూస్ చానల్లో జర్నలిస్ట్గా పనిచేసే శ్వేతకు భిక్షపతి (పోసాని కృష్ణమురళి), జేకే (మురళి శర్మ) అనే ఇద్దరు క్రిమినల్స్ చేసే ఓ భారీ స్కామ్ గురించి తెలుస్తుంది. ఈ విషయం గురించే పోలీసులకు తెలియజేయాలనుకుంటుండగా భిక్షపతి, జేకే మనుషులు శ్వేతను హతమరుస్తారు.
దీంతో కూతురు చావుకి కారణమైన వారిని శిక్షించాలంటూ శ్రీ శ్రీ చేసే న్యాయ పోరాటం వృథా అవుతుంది. నిస్సహాయ స్థితిలో తానే వారిని శిక్షించాలనుకున్న శ్రీ శ్రీ వారిని ఏం చేశాడూ? వారిపై ఎలా పగ తీర్చుకున్నాడూ? అన్నది మిగతా సినిమా.
ప్లస్ పాయింట్స్ :
సూపర్ స్టార్ కృష్ణ రోల్ ఈ సినిమాకు అన్నింటికీ మించి మేజర్ హైలైట్గా చెప్పుకోవచ్చు. ఆ పాత్రలో ఆయన చక్కగా ఒదిగిపోయి కనిపించారు. తన స్థాయికి తగ్గ నటనతో ఆయన హుందాగా నటించారు. ఇక ఈ వయసులోనూ ఒక ప్రధాన పాత్రలో నటించడంలో ఆయన చూపిన ఉత్సాహానికి అభినందించాల్సిందే! ముఖ్యంగా ఓ నిస్సహాయ ప్రొఫెసర్ పగ తీర్చుకోవడం ఎలా ఉంటుందో అన్న నేపథ్యం నుంచి పుట్టే సన్నివేశాలు బాగున్నాయి. ఇక కృష్ణ స్టార్డమ్ని దృష్టిలో పెట్టుకొని అనవసర ఆర్భాటాలు చేయకుండా, పగ తీర్చుకోవడం కూడా ఎక్కడా ఓవర్ చేయకుండా ఉండడాన్ని ప్లస్ పాయింట్గానే చెప్పుకోవాలి.
నరేష్ ఓ మర్డర్ మిస్టరీని చేజ్ చేయడంలో కీలక పాత్ర పోషించి మెప్పించారు. ఇక విజయ నిర్మల కూడా తన పాత్రకు న్యాయం చేశారు. కృష్ణ కూతురుగా నటించిన నటి చాలా బాగా చేసింది. మురళీ శర్మ, పోసాని తదితరులు తమ పాత్ర పరిధిమేర బాగానే నటించారు. ఇక సినిమా పరంగా ఫస్టాఫ్ రివెంజ్ బ్యాక్డ్రాప్తో బాగా ఆకట్టుకుంది.
మైనస్ పాయింట్స్ :
ఓ ఆకట్టుకునే ఫస్టాఫ్ తర్వాత సెకండాఫ్ దాదాపుగా నెమ్మదిగా, పెద్దగా కట్టిపడేసే సన్నివేశాలేమీ లేకుండా సాగుతుండడాన్నే మేజర్ మైనస్గా చెప్పుకోవాలి. ఈ పార్ట్లో ఫ్లాష్బ్యాక్ నేపథ్యాన్ని రెండు మూడు సార్లు చూపించడం కూడా బాగోలేదు. అదేవిధంగా ఇలాంటి కథల్ని ఇప్పటికే మనం చాలా చూసి ఉండడంతో కథ పరంగా కొత్తదనం ఆశించడానికి ఏమీ లేదు. ఇక కథనంలోనూ చివరికి ఏమైపోతుందో కూడా ముందే తెలిసిపోవడం ఈ సినిమా విషయంలో మరో మైనస్గా చెప్పుకోవాలి.
సెకండాఫ్లో నరేష్ క్యారెక్టర్ని కూడా సరిగ్గా డిజైన్ చేసినట్లు కనిపించదు. కొన్నిచోట్ల తక్కువ డీటైలింగ్ ఇవ్వడంతో కథలో క్లారిటీ లోపించినట్లు కనిపించింది. లాజిక్ని కూడా పెద్దగా పట్టించుకున్నట్లు కనిపించలేదు. కొన్ని కొన్ని చోట్ల ఈ సినిమా పాతతరం సినిమాల్ని చూస్తున్న ఫీలింగ్ కల్పించి బోర్ కొట్టిస్తుంది.
సాంకేతిక విభాగం :
సాంకేతిక అంశాల పరంగా చూస్తే, ముందుగా ఈ సినిమాను ఎక్కడా క్వాలిటీ పరంగా రాజీ పడకుండా, మంచి ప్రొడక్షన్ వ్యాల్యూస్తో నిర్మించిన విధానాన్ని మెచ్చుకోవాలి. కెమెరా వర్క్ చాలా బాగుంది. ముఖ్యంగా రివెంజ్ తీర్చుకునే నేపథ్యంలో వచ్చే సన్నివేశాలను చాలా బాగా క్యాప్చర్ చేశారు. ఎడిటింగ్ బాగుంది. డైలాగ్స్ కూడా కథకు తగ్గట్టుగా బాగున్నాయి.
దర్శకుడు ముప్పలనేని శివ విషయానికి వస్తే, ఫస్టాఫ్ వరకూ మంచి స్క్రీన్ప్లే రాసుకున్న ఆయన, సెకండాఫ్ విషయంలో మాత్రం రచయితగా పూర్తి స్థాయిలో రాణించలేకపోయారు. ఇక దర్శకుడిగానూ ఈ సినిమాలో ఆయన తన స్థాయికి తగ్గ ప్రతిభ చూపలేదు. అక్కడక్కడా ఫర్వాలేదనిపించినా, ఓవరాల్గా ఓ సినిమాను మనకు బోర్ కొట్టకుండా అందించే ప్రయత్నంలో మాత్రం పూర్తి స్థాయిలో అలరించలేకపోయారు.
తీర్పు :
సూపర్ స్టార్ కృష్ణ వెండితెరపై కనిపించి చాలాకాలమే అయింది. సినీ పరిశ్రమలో 50 వసంతాలు పూర్తి చేసుకున్న కృష్ణ రీ ఎంట్రీ సినిమాగా ప్రచారం తెచ్చుకున్న ‘శ్రీ శ్రీ’, ఆయన అభిమానులను అలరించేలానే ఉందని చెప్పొచ్చు. ఒక మంచి పాత్రలో, తన స్థాయికి తగ్గ నటనతో కృష్ణ బాగా మెప్పించడం, ఫస్టాఫ్లో వచ్చే సన్నివేశాలన్నీ ఆకట్టుకునేలానే ఉండడం ఈ సినిమాకు కలిసి వచ్చే అంశాలు. ఇకపోతే పాతకథను, అదే పాత ఫార్మాట్లో చెప్పడం, సెకండాఫ్ ఆకట్టుకునే స్థాయిలో లేకపోవడం లాంటివి ఈ సినిమాకు మైనస్. ఒక్కమాటలో చెప్పాలంటే.. సూపర్ స్టార్ కృష్ణ వెండితెరపై కనిపిస్తే చూడాలని ఎదురుచూస్తున్న అభిమానులకు ఈ సినిమా బాగానే నచ్చుతుంది.
తెలుగు సినీ పరిశ్రమలో దర్శకుడు త్రివిక్రమ్ సినిమా వస్తోందంటే దానిపై సినీ అభిమానుల్లో మంచి ఆసక్తి కనిపిస్తూంటుంది. తాజాగా ఆయన దర్శకత్వంలో తెరకెక్కిన ‘అ..ఆ..’ కూడా మొదట్నుంచీ మంచి క్రేజ్ తెచ్చుకుంది. నితిన్, సమంత హీరో, హీరోయిన్లుగా నటించిన ఈ సినిమా భారీ అంచనాల నడుమ నేడు ప్రేక్షకుల ముందుకు వచ్చింది. మరి సినిమా ఆ అంచనాలను అందుకునే స్థాయిలోనే ఉందా? చూద్దాం..
కథ :
అనసూయ రామలింగం (సమంత) ఓ సంపన్న కుటుంబంలో పుట్టి పెరిగిన యువతి. తన తల్లి మహాలక్ష్మి (నదియా) ఇష్టం మేరకే అందరూ నడుచుకోవాల్సి రావడం అనసూయకు నచ్చదు. ఈ క్రమంలోనే ఓ సారి తండ్రి రామ లింగం (నరేష్) సలహా మేరకు, కొన్ని రోజులు ప్రశాంతంగా గడపాలని తన అత్త ఇంటికి వెళుతుంది. అక్కడే అనసూయకు బావ ఆనంద్ విహారి (నితిన్) పరిచయమవుతాడు. కొద్దిరోజుల్లోనే అనసూయ ఆనంద్ విహారికి దగ్గరవుతుంది.
కాగా ఆనంద్ విహారికి కుటుంబం మాత్రం కొన్ని ఇబ్బందుల్లో ఉంటుంది. ఆ ఇబ్బందుల నుంచి బయటపడాలంటే ఆనంద్, పల్లం వెంకన్న (రావు రమేష్) కూతురు నాగవల్లి (అనుపమ)తో పెళ్ళికి ఒప్పుకోవాల్సి వస్తుంది. అదేవిధంగా అనసూయ తల్లి మహాలక్ష్మికి, ఆనంద్ కుటుంబానికి ఏళ్ళుగా వైరం ఉంటుంది. ఇలాంటి పరిస్థితుల్లో వీరి ప్రేమ ఏమైంది అన్నది సినిమా.
ప్లస్ పాయింట్స్ :
సున్నితమైన భావోద్వేగాలను, ప్రేమకథల్లో ఉండే కన్ఫ్యూజన్ను చాలా తెలివిగా చెప్పడంలో త్రివిక్రమ్ చూపిన ప్రతిభనే ఈ సినిమాకు అన్ని విధాలా ప్రధాన అనుకూలాంశంగా చెప్పుకోవాలి. ఒక పూర్తి స్థాయి ప్రేమకథలో, కుటుంబ బంధాలను కలిపి చెప్పడానికి ఏయే అంశాలు అవసరమో వాటన్నింటినీ త్రివిక్రమ్ పొందిగ్గా పొందుపర్చిన విధానం అబ్బురపరుస్తుంది. సినిమా పరంగా చూస్తే, ఈ సినిమా ఇంటర్వెల్, క్లైమాక్స్, ఆద్యంతం నవ్విస్తూనే, కదిలిస్తూనే సాగే సన్నివేశాల క్రమం వీటిని హైలైట్గా చెప్పుకోవచ్చు.
సమంత ఏ స్థాయి నటో ఈ సినిమా మరోసారి ఋజువు చేసేలా ఉంది. నితిన్, ఈ సినిమాతో కెరీర్ బెస్ట్ నటన ప్రదర్శించాడు. రావు రమేష్ తన నటనతో ఈ సినిమాను మరో ఎత్తుకు తీసుకెళ్ళాడనే చెప్పుకోవాలి. అనుపమ పరమేశ్వరన్ చూడముచ్చటగా ఉంది. స్క్రీన్పై అనుపమ కనిపించినప్పుడల్లా కళ్ళుతిప్పుకోనివ్వనంత అందంగా, తెలివిగా నటించింది.
మైనస్ పాయింట్స్ :
అ..ఆ..’ లో మైనస్ పాయింట్స్ గురించి చెప్పాలంటే కొన్ని చోట్ల సినిమా చాలా నెమ్మదిగా సాగడం గురించే మొదట చెప్పాల్సి ఉంటుంది. ముఖ్యంగా సెకండాఫ్లో కొన్ని సన్నివేశాలు సాగదీసినట్లు కనిపించాయి. త్రివిక్రమ్ సినిమాలన్నింటిలానే ఇందులోనూ యాక్షన్ ఎపిసోడ్స్ అక్కడక్కడా కథ స్థాయికి మించి, అసహజంగా కనిపించాయి. అలాగే సినిమా కూడా చాలా నెమ్మదిగా మొదలై అంతే నెమ్మదిగా మొదటి పది నిమిషాలు సాగుతుంది.
ఇక పూర్తిగా ఫ్యామిలీ ఎమోషన్స్, లవ్స్టోరీలోని కన్ఫ్యూజన్ చుట్టూనే తిరిగే ఈ సినిమా, మాస్ అంశాలను, హై లెవెల్ హీరోయిజాన్ని కోరుకునే ప్రేక్షకులకు ఈ సినిమా పెద్దగా కనెక్ట్ కాకపోవచ్చు.
సాంకేతిక విభాగం :
సాంకేతిక అంశాల పరంగా చూస్తే, ‘అ..ఆ..’ అన్ని విషయాల్లో పూర్తి స్థాయిలో ఆకట్టుకుందనే చెప్పాలి. తాను చెప్పాలనుకున్న అంశాన్నే తెలివిగా, తాను బాగా అర్థం చేసుకున్న పద్ధతిలోనే అందరికీ అర్థమయ్యేలా చెప్పడంలో దర్శకుడు త్రివిక్రమ్ చూపిన ప్రతిభ అద్భుతమనే చెప్పాలి. త్రివిక్రమ్ సినిమాల్లో ఎక్కువగా రచయిత దర్శకుడిపై పైచేయి సాధించడం చూస్తూంటాం. ఈ సినిమాలోనూ అదే కనిపిస్తుంది. లోతైన సంభాషణలను అందరికీ అర్థమయ్యేలా చెప్పడంలో త్రివిక్రమ్ ఎప్పటికప్పుడు చూపే నేర్పు సినిమా చూస్తున్నంత సేపూ ముచ్చటగొలిపేలా ఉంది. దర్శకుడిగానూ త్రివిక్రమ్ కొన్నిచోట్ల తన ప్రతిభను చూపారు.
ఇక మిక్కీ జే మేయర్ అందించిన పాటలన్నీ వినసొంపుగా ఉండడంతో పాటు సాహిత్యం పరంగానూ అద్భుతంగా ఉన్నాయి. ఇక ఆయా పాటలు సినిమాలో వచ్చే సందర్భాలు, నేపథ్యాలు కూడా బాగున్నాయి. నటరాజన్ సుబ్రమణ్యం సినిమాటోగ్రఫీ ఈ సినిమాకు ఓ స్థాయిని తెచ్చిపెట్టేంత అందంగా ఉందని చెప్పడంలో అతిశయోక్తి లేదు. విజువల్స్లో డీటైలింగ్ను ఎక్కువ చూపించే త్రివిక్రమ్తో కలిసి నటరాజన్ చాలాచోట్ల మ్యాజిక్ చేశారు. ఇక కోటగిరి వెంకటేశ్వర రావు ఎడిటింగ్ బాగుంది. ఆర్ట్ వర్క్ బాగుంది. ఎస్.రాధాకృష్ణ నిర్మాణ విలువలకు ఎక్కడా వంక పెట్టలేం.
తీర్పు :
త్రివిక్రమ్ సినిమాల్లో అందమైన భావోద్వేగాలుంటాయి. ప్రేమలు, బంధాలు, అలకలు, అసూయలు అన్నీ కలిపిన మనుషులు.. ఇవన్నీ ఉంటాయి. వీటి చుట్టూ తిరిగే కథల గురించి చెప్పినప్పుడల్లా త్రివిక్రమ్లోని రచయిత ఎప్పటికప్పుడు కొత్తగా బయటకు వస్తుంటాడు. అ..ఆ..లోనూ త్రివిక్రమ్ ఎప్పుడూ చేసే ఆ మ్యాజిక్ ఉంది. బంధాల్లో గీసుకున్న గీతలు, ప్రేమలోని కన్ఫ్యూజన్ చుట్టూ త్రివిక్రమ్ చెప్పిన ఈ ప్రేమకథ, చెప్పాలనుకున్న విషయాన్ని పొందిగ్గా, అందంగా అల్లిన సన్నివేశాలతో కట్టిపడేసే స్థాయిలోనే ఉందని చెప్పొచ్చు. సమంత, నితిన్, రావురమేష్ల నటన, త్రివిక్రమ్ రచన, ప్రాక్టికల్గా కనిపించే క్లైమాక్స్.. లాంటి ప్లస్లతో వచ్చిన ఈ సినిమాలో సెకండాఫ్ కాస్త నెమ్మదించడం అన్నది ఒక్కటే చెప్పుకోదగ్గ ప్రతికూలాంశం. ఒక్క మాటలో చెప్పాలంటే.. త్రివిక్రమ్ తన రచనతో అందంగా దిద్దిన ప్రేమకథే ’అ..ఆ..’!!
సౌత్ లో ఎందరో అభిమానులని సంపాదించిన ప్రియమని నిశ్చితార్ధం బెంగళూరులోని ఆమె ఇంటిలొ జరిగింది. చెన్నైకి చెందిన వ్యాపారవేత్త ముస్తఫారాజ్ తో చాలా కాలంగా ఆమె ప్రేమలొ ఉన్న సంగతి తెలిసిందే. శుక్రవారం తమ నిశ్చితార్ధం జరిగిన విషయాన్ని ప్రియమని ట్విట్టర్ ద్వార చెప్పింది..
ఐపిఎల్ 2016 విజేతగా సన్రైజర్స్ హైదరాబాద్ అవతరించింది. 8 పరుగుల తేడాతో బెంగుళూరు జట్టును ఓడించింది. 209 పరుగుల టార్గెట్ను ఛేదించకుండా బెంగుళూరు జట్టును కట్టడి చేసింది. 6 బంతుల్లో 18 పరుగులు చేయాల్సి ఉండగా ఆఖరి ఓవర్ వేశాడు భువనేశ్వర్. కెప్టెన్ వార్నర్ భూవీతో పలుమార్లు మంతనాలు జరిపాడు. అద్భుతంగా బౌలింగ్ చేసిన భువనేశ్వర్ బెంగుళూరు టెయిలెండర్స్ను కట్టడి చేయగలిగాడు. 20వ ఓవర్ మూడో బంతికి భూవీ వేసిన చక్కని బంతిని కీపర్ అందుకుని రనౌట్ చేశాడు. ఆ సమయానికి 3 బంతుల్లో 15 పరుగులు చేయాల్సిన పరిస్థితి ఉంది. దీంతో ఒత్తిడిలో ఉన్న బెంగళూరు ఆటగాళ్లు చేతెలెత్తేశారు. ఐపిఎల్ చరిత్రలో మొదటిసారిగా కప్ను అందుకుంది సన్రైజర్స్ టీం.
జట్టు స్కోర్లు : సన్రైజర్స్ హైదరాబాద్ 208/7(20 ఓవర్లలో), రాయల్ ఛాలెంజర్స్ బెంగళూరు 200/7 (20 ఓవర్లలో)
హైదరాబాద్ బ్యాటింగ్ : వార్నర్ 69, బెన్ కటింగ్ 39, యువరాజ్ 38, ధావన్ 28
’బ్రహ్మోత్సవం’... సూపర్ స్టార్ మహేష్ హీరోగా నటించిన ఈ సినిమా కొద్దికాలంగా సగటు తెలుగు సినీ ప్రేక్షకుడిని ఎంతగానో ఎదురుచూయిస్తూ వస్తోన్న సినిమాల్లో మొదటి స్థానంలో ఉన్న సినిమా. మహేష్తో కలిసి గతంలో ‘సీతమ్మ వాకిట్లో సిరిమల్లె చెట్టు’ లాంటి అందమైన సినిమాను మనకు అందించిన దర్శకుడు శ్రీకాంత్ అడ్డాల తెరకెక్కించిన ఈ సినిమా అన్ని కార్యక్రమాలనూ పూర్తి చేసుకొని భారీ అంచనాల నడుమ నేడు ప్రేక్షకుల ముందుకు వచ్చేసింది. మరి ఆ అంచనాలను అందుకునే స్థాయిలోనే ఈ ‘బ్రహ్మోత్సవం’ ఉందా? చూద్దాం...
కథ : విజయవాడలో ఓ ప్రముఖ వ్యాపారవేత్త అయిన చంటబ్బాయి (సత్యరాజ్)ది అందరూ కలిసి ఉండాలని కోరుకునే మనస్థత్వం. అతడి చెల్లెళ్ళు, వాళ్ళ కుటుంబాలు, అంతా కలిసి ఉత్సవంలా ఒకచోట ఉండి జీవితాలను గడుపుతుంటారు. చంటబ్బాయి లాంటి ఆలోచనలున్న వ్యక్తే అతడి కుమారుడు మహేష్ బాబు. ఏదీ పెద్దగా ఆలోచించకుండానే చేసేసే మనస్థత్వం ఉన్న మహేష్, ఎవ్వరితోనైనా ఇట్టే కలిసిపోయి సరదాగా ఉంటూ, తండ్రి వ్యాపారాలు చూసుకుంటూ బతికేస్తుంటాడు. అంతా బాగుందనుకునే సమయంలోనే, ఆ ఇంట్లో వ్యక్తే అయిన రావు రమేష్ వల్ల ఓ గొడవ జరుగుతుంది.
ఆ గొడవ తర్వాత చంటబ్బాయి చనిపోవడంతో, ఇంట్లో పరిస్థితులన్నీ మారిపోతాయి. ఇలా మారిపోయిన పరిస్థితుల నుంచి, బంధాలంటే ఏంటో, తానేంటో తెలుసుకోవాలనే ప్రయత్నంలో మహేష్, సమంతతో కలిసి ఓ ప్రయాణం మొదలుపెడతాడు. ఆ ప్రయాణం ఏంటి? సమంత ఎవరు? ఈ ప్రయాణంలో మహేష్ ఏమేం తెలుసుకున్నాడూ? చివరకు తన ఇంట్లో పరిస్థితులను మార్చేందుకు అతడికి ఆ ప్రయాణం ఎలా ఉపయోగపడిందీ? కాశి (కాజల్)తో అతడి తొలిప్రేమ కథేంటీ? లాంటి ప్రశ్నలకు సమాధానమే మిగతా కథ.
ప్లస్ పాయింట్స్ : మహేష్ లాంటి సూపర్ స్టార్తో, కమర్షియల్ సినిమా హంగులను ఏమాత్రం పట్టించుకోకుండా, ఓ కథ చెప్పాలన్న దర్శకుడు శ్రీకాంత్ అడ్డాల సాహసాన్నే ఈ సినిమాకు అన్నింటికీ మించిన ప్రధానమైన అనుకూలాంశంగా చెప్పుకోవాలి. నలుగురికి మంచి పంచుతూ, అందరితో కలిసిమెలిసి ఉండడమనే ప్రధానాంశాన్ని సినిమా కథలో అంతర్లీనంగా చెప్పిన విధానం గురించి ఎంత చెప్పినా తక్కువే! ఇక మానవ సంబంధాలను, ఉమ్మడి కుటుంబంలోని ఆలోచనా విధానాలు, భావోద్వేగాలను శ్రీకాంత్ అడ్డాల తనదైన ముద్ర కనిపించేలా చెప్పిన విధానం కూడా చాలా బాగుంది.
ఇక సూపర్ స్టార్ మహేష్ ఎప్పట్లానే ఈ సినిమాకు ప్రధాన బలంగా నిలబడి, సినిమాను తన చరిష్మాతో ముందుకు నడిపించాడు. ఇలాంటి ఒక కథను తన స్టార్ స్టేటస్ గురించి ఆలోచించకుండా, నిజాయితీగా కథకే కట్టుబడి ఉంటూ చేయడమనేది మహేష్ ఈ సినిమా విషయంలో సాధించిన పెద్ద విజయంగా చెప్పుకోవచ్చు. నటనలో మహేష్ స్థాయి ఏంటన్నది ఇప్పటికే చాలా సినిమాలు ఋజువుచేయగా, బ్రహ్మోత్సవం కూడా ఇదే అంశాన్ని మరోసారి బలంగా ఋజువుచేస్తూ, ఆయన స్థాయి మరింత ఎత్తుకు తీసుకెళ్ళింది. ఇక సమంత తన పాత్రలో ఒదిగిపోయి నటించింది. మహేష్-సమంతల కాంబినేషన్లో వచ్చే జర్నీ బాగుంది. ఇక కాజల్ ఈ సినిమాలో తాను ఇంతకుముందెప్పుడూ చేయని తరహా పాత్రలో చూపిన ప్రతిభ చాలా బాగుంది. మహేష్-కాజల్ల ప్రేమకథ కూడా సహజంగా ఉంది. ఇక ప్రణీతది చిన్న పాత్రైనా బాగా చేసింది. రావు రమేష్ గురించి ఇక్కడ ప్రత్యేకంగా ప్రస్తావించుకోవాలి. కథను బలంగా ప్రభావితం చేసే పాత్రలో ఆయన నటన కట్టిపడేసేలా ఉంది. సత్యరాజ్ ఓ బలమైన పాత్రలో సినిమాకు నిండుతన తెచ్చారు. ఇక రేవతి, జయసుధ, నరేష్, తులసి, వెన్నెల కిషోర్, తనికెళ్ళ భరణి.. ఇలా సినిమాలో కీలక పాత్రల్లో నటించిన వారంతా తమ నటనతో ఆకట్టుకుంటారు.
సినిమా పరంగా చూసుకుంటే… అసలు కథను పరిచయం చేయడం, మహేష్-సమంతల జర్నీ నేపథ్యంలో వచ్చే సన్నివేశాలు, కుటుంబమంతా కలిసి ఓ పండగలా జీవితాల్ని ఆస్వాధించడం, అదిరిపోయే ఇంటర్వెల్ బ్యాంగ్, మహేష్-కాజల్ల రొమాన్స్, క్లైమాక్స్ లాంటివి ప్రధాన అనుకూలాంశాలుగా చెప్పుకోవచ్చు.
మైనస్ పాయింట్స్ :
ఈ సినిమాకు ప్రధానమైన ప్రతికూలాంశం అంటే, కథ వేగం చాలా నెమ్మదిగా ఉండడమని చెప్పుకోవాలి. సెకండాఫ్లో మహేష్-సమంతల జర్నీ బాగున్నా, దానికి ముందొచ్చే సన్నివేశాలేవీ అంత బలంగా లేకపోవడంతో, ఈ జర్నీ లాజిక్ లేని విషయంగా కనిపిస్తుంది. ఇక కొన్ని సన్నివేశాలు తిరిగి తిరిగి అక్కడికే వస్తున్నాయన్నట్లుగా సెకండాఫ్లో ఈ ఎపిసోడ్ సాగుతూంటుంది. ఇక సాధారణంగా కమర్షియల్ సినిమాల్లో కోరుకునే అంశాలేవీ లేని సినిమా కావడం కూడా అలాంటి అంశాలను కోరేవారికి నచ్చకపోవచ్చని విషయంగా చెప్పుకోవచ్చు. సమంత కథలోకి ఎంట్రీ ఇచ్చిన విధానం కూడా పెద్దగా ఆకట్టుకోదు. ఇక కొన్నిచోట్ల విజువల్ ఎఫెక్ట్స్ కూడా సినిమా స్థాయికి తగ్గట్టుగా లేవు.
సాంకేతిక విభాగం : సాంకేతిక అంశాల పరంగా చూస్తే, ‘బ్రహ్మోత్సవం’ అన్నివిధాలా బాగుందనే చెప్పుకోవచ్చు. శ్రీకాంత్ అడ్డాల రచనలో ఎంత లోతుందో, తాను చెప్పాలనుకున్న అంశాలను కథగా తెలివిగా చెప్పించిన విధానం చూస్తే ఇట్టే అర్థమైపోతుంది. చిన్నదే అయినా, బలమైనది కూడా అయిన ఒక అంశం చుట్టూ కథ చెప్పాలనుకోవడం, దాన్ని కథగా చెప్పడానికి ఏమేం కావాలో వాటన్నింటితో ఓ మంచి స్క్రీన్ప్లే రాసుకోవడం లాంటి విషయాల్లో శ్రీకాంత్ అడ్డాల ప్రతిభను చూడొచ్చు. డైలాగ్స్ పరంగానూ శ్రీకాంత్ మరోసారి తన స్థాయిని చాటుకున్నాడు. దర్శకుడిగా ప్రతి దర్శకుడూ ఒక బ్రాండ్ కోరుకుంటాడు. శ్రీకాంత్ రెండో సినిమాతోనే దాన్ని సాధించి, ‘బ్రహ్మోత్సవం’ దగ్గరకొచ్చేసరికి ఆ బ్రాండ్ని అలాగే నిలబెట్టుకున్నాడు.
ఇక రత్నవేలు సినిమాటోగ్రఫీ గురించి ఎంత చెప్పుకున్నా తక్కువే! సాధారణంగా తెలుగు సినిమాల్లో కనిపించని, బాలీవుడ్కు మాత్రమే సాధ్యమనుకున్న ఓ ఫ్లేవర్ను సెకండాఫ్లో చూడొచ్చు. అది రత్నవేలు ప్రతిభ వల్లే అని ప్రత్యేకించి చెప్పక్కర్లేదు. మిక్కీ జే మేయర్ సమకూర్చిన పాటలు ఇప్పటికే అంతటా సూపర్ హిట్ అనిపించుకోగా, సినిమాలో, ఆయా సందర్భాల్లో వచ్చే ఈ పాటలు బాగున్నాయి. గోపీ సుందర్ అందించిన బ్యాక్గ్రౌండ్ స్కోర్, రీ రికార్డింగ్ సినిమా స్థాయికి తగ్గట్టే బాగున్నాయి. కోటగిరి వెంకటేశ్వర రావు ఎడిటింగ్ బాగుంది. ఇలాంటి సినిమాలకు కావాల్సిన మూడ్ను ఎడిటింగ్ ద్వారా ఆయన బాగానే క్యారీ చేశారు. తోట తరణి ఆర్ట్ వర్క్ గురించి కొత్తగా చెప్పడానికి ఏమీ లేదు. ఆయన స్థాయి ఎంతటిదో ఈ సినిమా మరోసారి ఋజువు చేసింది. పీవీపీ సినిమా నిర్మాణ విలువలను ప్రశంసించకుండా ఉండలేం.
తీర్పు : అందరూ కలిసి, ఒకరికొకరు అండగా నిలబడడమే ఎవ్వరి జీవితంలోనైనా అతి పెద్ద ఉత్సవం అని చెప్పే సినిమాయే ‘బ్రహ్మోత్సవం’. ఈ విషయాన్ని తెలుసుకునేందుకే, ఎవ్వరిని పలకరించడానికైనా పెద్దగా ఆలోచించక్కర్లేదనే కథానాయకుడు చేసే ప్రయాణమే మేజర్ హైలైట్. ఆ కథానాయకుడి పాత్రలో నటించిన మహేష్ సినిమాను తన చరిష్మాతో ముందుండి నడిపించడంలో సఫలమయ్యాడు. శ్రీకాంత్ అడ్డాల కథగా చెప్పాలనుకున్న ఆలోచన, కట్టిపడేసే కొన్ని భావోద్వేగాలు, ప్రయాణాలు ఇవన్నీ ఈ సినిమాకు ప్లస్ పాయింట్స్. ఇకపోతే కథ చాలా నెమ్మదిగా సాగడం, సెకండాఫ్లో కొన్ని లాజిక్కి సంబంధం లేని అంశాలు లాంటివి మైనస్ పాయింట్స్గా చెప్పుకోవాలి. ఒక్కమాటలో చెప్పాలంటే.. మూలాల్ని వెతికే ప్రయాణంలో బంధాల్ని అర్థం చేసుకోవచ్చని, ఆ బంధాలు అలా సాగడమే ‘బ్రహ్మోత్సవం’ అని చెప్పే ఆలోచనకు కనెక్ట్ అయితే, ఈ సినిమా బాగా ఆకట్టుకుంటుందనే చెప్పొచ్చు.
మూడు రాష్ట్రాలు, రెండు దేశాలలో బీబత్సం సృష్టిస్తున్న బుడ్డోడు...!!!
టెంపర్, నాన్నకు ప్రేమతో సినిమాలతో వైవిద్యం చూపిస్తూ జోరు మీద ఉన్న బుడ్డోడు ఇప్పుడు పూర్తి మాస్ మసలా సినిమాతొ అభిమానులని అలరించడానికి సిద్దం అవ్తున్నాడు. మీసాలు రాకమునుపే తెలుగు సినీ పరిస్రమలో మాస్ హీరోగా ఎవరు అందుకొలేని స్థాయికి ఎదిగిన యంగ్ టైగర్ ఎన్.టి.ర్., రజనీకాంత్ ని సైతం ఆశ్చర్య పరిచాడు మన బుడ్డోడు. తెలుగు రాష్ట్రాలలోనే కాకుండా, కర్ణాటకా, కేరలతో పాటు, రజనీకాంత్ తరువాత జపాన్ లో అంతటి క్రేజ్ ఉన్న నటుడు మన బుడ్డోడు.
మిర్చి, శ్రీమంతుడు లాంటి వరుస విజయాలతొ ఉన్న కొరటాల శివ, ఎన్.టి.ర్. తో తీస్తున్న "జనతా గేరేజ్" చిత్రం 1లుక్ ని తారక్ పుట్టిన రోజు సందర్బంగా విడుదల చేసారు. తారాక్ పొస్టర్లు చూసి అభిమానులు పండగ చేసుకుంటున్నారు.
TOLLY BEATS RATING: 4.75/5 ( This decade highest rating)
13 బీ’, ‘ఇష్క్’, ‘మనం’ చిత్రాలతో దర్శకుడిగా తనదంటూ ఓ బ్రాండ్ సెట్ చేసుకున్న దర్శకుడు విక్రమ్ కుమార్, తమిళ సూపర్ స్టార్ సూర్యతో కలిసి ’24’ అనే సైన్స్ ఫిక్షన్ కథతో మనముందుకు వచ్చారు. సూర్య తన సొంత బ్యానర్పై నిర్మించిన ఈ సినిమా భారీ అంచనాల మధ్య నేడు ప్రపంచవ్యాప్తంగా విడుదలైంది. మరి సినిమా ఆ అంచనాలను అందుకుందా? చూద్దాం..
కథ :
శివ కుమార్ (సూర్య) ఓ సైంటిస్ట్. తన భార్య ప్రియ (నిత్యా మీనన్), నెలల వయసుండే కొడుకుతో కలిసి ఓ ప్రశాంతమైన పరిసరాల్లో జీవిస్తూ, ఓ వాచీని కనిపెట్టే ప్రయత్నాల్లో ఉంటాడు. ఆ వాచీతో కాలంలో ముందుకు, వెనక్కి వెళ్ళే అవకాశం ఉండడమే దాని ప్రత్యేకత. అలాంటి వాచీని తన సొంతం చేసుకోవాలని శివకు కవల సోదరుడైన ఆత్రేయ (సూర్య) ప్రయత్నిస్తూంటాడు. అలాంటి ప్రయత్నాల్లోనే కొన్ని అనూహ్య పరిస్థితుల్లో, శివ, ప్రియ ప్రాణాలు కోల్పోవడమే కాకుండా ఆ వాచీని, తమ కుమారుడిని ఎవరో తెలియని ఓ యువతి (శరణ్య) చెంత చేరుస్తారు. 26 ఏళ్ల తరువాత, తల్లి శరణ్యతో సంతోష జీవితం గడిపే మణి (సూర్య)కు తమ వద్ద ఉండే ఆ వాచీ గురించి తెలుస్తుంది. మణికి ఈ వాచీ దొరికిందన్న విషయం కూడా అప్పుడే 26ఏళ్ళు కోమాలో ఉండి బయటకొచ్చిన ఆత్రేయకు కూడా తెలుస్తుంది. ఆ తర్వాత ఏం జరిగింది? ఆ వాచీ ఎలా పనిచేస్తుంది? మణి దగ్గర వాచీ ఉందని తెలుసుకున్న ఆత్రేయ అతడ్ని ఏం చేశాడు? ఇలాంటి ప్రశ్నలన్నింటికీ సమాధానమే మిగతా కథ.
ప్లస్ పాయింట్స్ :
ఈ సినిమాకు ప్రధానమైన అనుకూలాంశం అంటే కథా ఆలోచన దగ్గర్నుంచి, చూస్తున్న ప్రతీ సన్నివేశం కట్టిపడేసేంత కొత్తదనంతో ఓ మాయలా ఉండడం గురించి చెప్పుకోవాలి. కాలంలో ముందుకు, వెనక్కి వెళ్ళడం అనే ఆలోచన తెలుగు సినిమాకు కొత్తది కాకపోయినా, ఈ సినిమాలో ఆ అంశం పక్కనబెడితే మిగతాదంతా చాలా కొత్తది. ఇలాంటి ఒక ప్రయత్నాన్ని ఇండియన్ సినిమా పరిస్థితులకు తగ్గట్టు చెప్పడం దర్శకుడిగా విక్రమ్ కుమార్ ఈ సినిమాలో చూపిన అద్భుతమైన ప్రతిభగా చెప్పుకోవాలి. ప్రతీ పావుగంటకు ఒక ట్విస్ట్, ప్రతీ సన్నివేశంలో కొత్త కొత్త ఆలోచనలు, పరిస్థితులు కల్పిస్తూ కథను ముందుకు నడిపే విధానం కట్టిపడేసేలా ఉంది.
ఇక ఈ సినిమాలో మూడు పాత్రలు చేసిన సూర్య సినిమానంతా తన ఈజ్తో మరింత ఉత్సాహంతో నడిపించాడు. శివ, ఆత్రేయ, మణి.. ఇలా ప్రతి పాత్రలోనూ సూర్య చూపిన నేర్పు, ఆయన నటనా స్థాయిని మరోసారి బలంగా పరిచయం చేసింది. నిత్యా మీనన్ ఉన్న కొద్దిసేపైనా చాలా బాగా నటించింది. సమంత తనకు అలవాటైన పాత్రలో బాగా నటించింది. చిన్న చిన్న ఎక్స్ప్రెషన్స్ కూడా సరిగ్గా పలికించడంలో సమంత ప్రతిభను ఈ సినిమాలో మరోసారి చూడొచ్చు. శరణ్య తన నటనతో ఆ పాత్ర స్థాయిని మరింత పెంచారు. ఇక ఆత్రేయ వెన్నంటి ఉండే మిత్ర అనే పాత్రలో అజయ్ నటన చాలా బాగుంది.
సినిమా పరంగా చూసుకుంటే, ఈ సినిమాలో ఇంటర్వెల్ బ్యాంగ్, ప్రీ క్లైమాక్స్, క్లైమాక్స్ ట్విస్ట్.. ఇలా పతాక సమయాలన్నింటిలో సినిమా కట్టిపడేసేలానే ఉందని చెప్పొచ్చు.
మైనస్ పాయింట్స్ :
ఈ సినిమాకు మైనస్ పాయింట్స్ అంటే మొదటగా పాటల గురించే చెప్పుకోవాలి. రహమాన్ అందించిన పాటలు, వాటి చిత్రీకరణా రెండూ బాగున్నా కూడా కథా గమనంలో ఆ పాటలు రావడం బాగోలేదు. అదేవిధంగా ఫస్టాఫ్లో వాచీ పనిచేసే అంశాన్ని ఎక్కువసార్లు చూపించినట్లు అనిపించింది. ఇక కాలంలో ముందుకు, వెనక్కి వెళ్ళడం సాధ్యమా? ఈ ఆలోచన చుట్టూ పరిస్థితులు ఎలా మారిపోతాయి? ఇలాంటి ప్రశ్నలేవీ లేకుండా ఈ సినిమాను చూడలేని వారికి సినిమా నచ్చకపోవచ్చు.
సాంకేతిక విభాగం : సాంకేతిక అంశాల పరంగా చూస్తే, ఈ సినిమా అన్నివిధాలా ది బెస్ట్ అని చెప్పుకోవాలి. ముఖ్యంగా దర్శకుడు విక్రమ్ కుమార్ ప్రతిభ గురించి ఇక్కడ ఎంత మాట్లాడుకున్నా తక్కువే! ఇలాంటి కథా ఆలోచనను సినిమాగా తీయాలనుకోవడం, ఆ కథా ఆలోచనను ఇండియన్ సినిమా పరిస్థితులకు తగ్గట్టుగా మార్చుకుంటూ ఓ బలమైన స్క్రీన్ప్లే రాసుకోవడం, ఆ స్క్రీన్ప్లేతో టెక్నికల్గానూ ఎక్కడా కాంప్రమైజ్ అవ్వకుండా, అన్ని రకాల ఆలోచనలున్న ప్రేక్షకులకు అర్థమయ్యేలా సినిమా తీయడం.. ఇలా దర్శకుడిగా, రచయితగా ఈ సినిమాను విక్రమ్ కుమార్ మ్యాజిక్గా చెప్పుకోవచ్చు. తన సినిమాకు ముందే ఒక బ్రాండ్ను సెట్ చేసుకున్న విక్రమ్ కుమార్, ఈ సినిమాతో దాని స్థాయిని మరింత పెంచుకున్నాడు.
సినిమాటోగ్రాఫర్ తిరు పనితనం టెక్నికల్గా సినిమా స్థాయిని ఎక్కడికో తీసుకెళ్ళింది. ముఖ్యంగా కథ హార్సిలి వ్యాలీ నేపథ్యంలో నడిచేప్పుడు తిరు ప్రతిభను మెచ్చుకోకుండా ఉండలేం. ఏ.ఆర్.రహమాన్ అందించిన బ్యాక్గ్రౌండ్ స్కోర్కు ఎక్కడా వంక పెట్టలేం. ‘ప్రేమ పరిచయమే’, ‘కాలం నా ప్రేయసివే’, ‘లాలిజో’ పాటలు వినడానికి బాగున్నాయి. విజువల్ ఎఫెక్ట్స్ కూడా కథా పరిధి మేరకే ఉంటూ కట్టిపడేసేంత అద్భుతంగా ఉన్నాయి. ప్రవీణ్ పూడి ఎడిటింగ్ చాలా బాగుంది. ఎడిటింగ్ ఎఫెక్ట్స్తో కూడా సినిమాకు మంచి ఫీల్ వచ్చింది. తెలుగు డబ్బింగ్ వర్క్ కూడా చాలా బాగుంది. తన సొంత బ్యానర్లో సినిమా అంటే అది ఏ స్థాయిలో ఉంటుందో, సూర్య, నిర్మాణ విలువలతో పరిచయం చేశాడు.
తీర్పు :
కొత్తదనమున్న ఆలోచనకు, సినిమాకు ఏ భాషా సినీ పరిశ్రమలో అయినా ఎప్పుడూ ఆదరణ ఉంటుంది. అయితే ఆ ఆలోచనను ఓ కథగా, పూర్తి స్థాయి సినిమాగా, అప్పటి పరిస్థితులకు, ప్రేక్షకుడి ఆలోచనకు ఎలా కలుపుతుమాన్నదే ఇక్కడ ప్రధానాంశం. ’24’.. ఈ ప్రధానాంశాన్ని బాగా ఒడిసిపట్టుకొని, ఓ కొత్త ఆలోచనతో వచ్చిన కొత్తదనమున్న సినిమా. కథా ఆలోచనలో, కథనంలో, దర్శకత్వ అంశాల్లో. ఇలా అన్ని విషయాల్లో దర్శకుడు విక్రమ్ కుమార్ చూపిన అద్భుతమైన ప్రతిభే ఈ సినిమాకు ప్రధానమైన అనుకూలాంశం. ఇక దానికి సూర్య నటనా చాతుర్యం కలిసి సినిమాను మరో స్థాయికి తీసుకెళ్ళాయి. ఒక్క సందర్భం లేకున్నా వచ్చే పాటలు, కొద్దిగా సాగదీసిన రొమాంటిక్ ట్రాక్ తప్ప ఈ సినిమాకు ప్రతికూలాంశాలు పెద్దగా లేవు. చివరిమాటగా చెప్పాలంటే.. సినిమా అయిపోయి బయటకొచ్చాక, కొన్ని ప్రశ్నలను, వాటి వెంటే సమాధానాలనూ మోసుకొచ్చే సినిమాలు అరుదుగా వస్తాయి. ’24’.. అలాంటి అరుదైన ప్రయోగాత్మక సినిమాల్లో ఒకటి.
నారా రోహిత్, ఇషా తల్వార్ జంటగా నటించిన చిత్రం ‘రాజా చెయ్యి వేస్తే’. తారకతన్న ఓ ప్రధాన పాత్రలో కనపడనున్నారు. ప్రదీప్ దర్శకుడిగా పరిచయమవుతున్న ఈ సినిమా సెన్సార్ కార్యక్రమాలను పూర్తి చేసుకుని యు/ఎ సర్టిఫికెట్ పొందింది. వారాహి చలన చిత్రంపై సాయి కొర్రపాటి నిర్మించిన ఈ సినిమాకి సాయి కార్తీక్ సంగీతం అందించారు. తారకరత్న విలన్ పాత్రలో నటిస్తుండటం, ఇప్పటికే విడుదల ప్రచార చిత్రాలు సినిమాపై అంచనాలను పెంచాయి. వరుస సినిమాలతో జోరు మీదున్న రోహిత్కి ఈ సినిమా ఎలాంటి ఫలితాన్ని మిగులుస్తుందన్నది, అస్సలు రాజా ఎవరిమీద చేయ్యి వేసాడో ఈ నెల 29 తేలనుంది.
గోల్కొండ హైస్కూల్, తను నేను, చిత్రాల హీరో సంతోష్ శోభన్ కథానాయకుడిగా సింప్లీ జిత్ ప్రొడక్షన్స్ పతాకంపై క్రియేటివ్ డైరెక్టర్ కృష్ణవంశీ దగ్గర అసోసియేట్గా వర్క్ చేసిన శ్రీనివాస్ చక్రవర్తి దర్శకత్వంలో అభిజిత్ జయంతి ఓ యూత్ఫుల్ ఎంటర్టైనర్ను నిర్మిస్తున్నారు. ఈ చిత్రం షూటింగ్ జూన్ నుంచి స్టార్ట్ అవుతుంది. ఈ చిత్రంలో నటించే ఇతర నటీనటులు, సాంకేతిక నిపుణుల వివరాలు త్వరలోనే ప్రకటిస్తారు.
మాస్ దర్శకుడు బోయపాటి శ్రీను దర్శకత్వంలో తెరకెక్కిన ఈ సినిమాను గీతా ఆర్ట్స్ పతాకంపై అల్లు అరవింద్ భారీ బడ్జెట్తో నిర్మించారు. బన్నీని పూర్తి స్థాయి మాస్ హీరోగా పరిచయం చేసే సినిమాగా ప్రచారం పొందిన ‘సరైనోడు’, ఆ టార్గెట్ను ఎంతవరకు రీచ్ అయ్యాడూ? తారాస్థాయిలో ఉన్న అంచనాలను అందుకోగలిగాడా? చూద్దాం...
కథ : బార్డర్లో కంటే సమాజంలోనే ఎక్కువ సమస్యలున్నాయని చెప్పి, గన (అల్లు అర్జున్) తన మిలిటరీ ఉద్యోగాన్ని వదిలేసి హైద్రాబాద్లో కుటుంబంతో కలిసి జీవిస్తుంటాడు. బాబాయ్ (శ్రీకాంత్)తో కలిసి వ్యవస్థకు అందని నేరగాళ్లకు తన స్టైల్లో బుద్ధి చెప్పడమే గన పని. ఇదిలా సాగుతుండగానే, గన, తానుండే ఏరియాకి ఎమ్మెల్యే అయిన హన్షితా రెడ్డి (క్యాథరిన్ థ్రెసా)తో ప్రేమలో పడతాడు. హన్షితాతో గన పెళ్ళి ఫిక్స్ అవుతున్న సమయంలో, అతణ్ణి వెతుక్కుంటూ, కాపాడమని మహాలక్ష్మి (రకుల్ ప్రీత్) వస్తుంది.
మహాలక్ష్మి ఏ ఆపదలో ఉండి గన కోసం వచ్చింది? మహాలక్ష్మికి, గనకి సంబంధం ఏంటి? తన బ్యాక్గ్రౌండ్ని టచ్ చేస్తే, తనకు కావాల్సింది దొరక్కపోతే ఎంతకైనా తెగించే వైరం ధనుష్ (ఆది)కి మహాలక్ష్మి గ్రామానికి ఉన్న సంబంధం ఏంటి? వ్యవస్థ మొత్తాన్నీ తన చెప్పు చేతల్లో పెట్టుకున్న ధనుష్ని గన ఎలా ఎదిరించాడు? లాంటి ప్రశ్నలకు సమాధానమే మిగతా కథ. ప్లస్ పాయింట్స్ :
ఈ సినిమాకు మేజర్ ప్లస్ పాయింట్ అంటే అల్లు అర్జున్ను పూర్తి స్థాయి మాస్ హీరోగా పరిచయం చేసేందుకు ఏయే అంశాలైతే అవసరమో వాటిని దర్శకుడు బోయపాటి సరిగ్గా వాడిన విధానం గురించి చెప్పుకోవచ్చు. ఇక ఇలాంటి ఒక మాస్ పాత్రలో నటించగలనని ఋజువు చేసుకున్న బన్నీ కూడా ఈ సినిమాకు హైలైట్స్లో ఒకరుగా చెప్పుకోవచ్చు. యాక్టింగ్లో, డైలాగ్ డెలివరీలో, స్టైల్లో అన్నింటా బన్నీ కట్టిపడేశాడు. ముఖ్యంగా యాక్షన్స్ సీక్వెన్సెస్, పాటల్లో బన్నీ స్టామినా ఏంటో ఈ సినిమాతో మరోసారి స్పష్టం అవుతుంది. ఇక సినిమాను చాలాచోట్ల తన ఈజ్, స్క్రీన్ ప్రెజెన్స్తో భుజాలపై మోసుకొచ్చాడనే చెప్పాలి.
విలన్ ఆది పినిశెట్టిని సినిమాకు మరో హైలైట్గా చెప్పుకోవచ్చు. హీరోగా బాగానే మెప్పిస్తోన్న ఆది, ఈ సినిమాలో విలన్గా చేసి సినిమాకు మంచి స్థాయి తీసుకొచ్చాడు. ముఖ్యంగా తక్కువ మాట్లాడుతూ, స్టైలిష్గా కనిపిస్తూనే ఈ స్థాయి విలనిజం చూపడంలో ఆది ప్రతిభ బాగుంది. పాటల చిత్రీకరణ ఈ సినిమాకు మరో ప్లస్ పాయింట్గా చెప్పుకోవచ్చు. హీరోయిన్లు ఇద్దరూ తమ తమ అందచందాలతో బాగా ఆకట్టుకుంటారు. రకుల్ ప్రీత్ సింగ్ ఎప్పట్లానే తాను మంచి నటినేనని మరోసారి నిరూపించుకుంది. ముఖ్యంగా ఇంటర్వెల్ బ్లాక్లో రకుల్ నటన చాలా బాగుంది. ఇక క్యూట్గా కనిపిస్తూనే, తన పాత్రకు నటన పరంగా క్యాథరిన్ థ్రెసా మంచి న్యాయం చేసింది. శ్రీకాంత్ తన పాత్రలో ఒదిగిపోయాడు. మిగతా వారంతా తమ పరిధిమేర బాగా నటించారు.
సినిమా పరంగా చూస్తే.. హీరో, విలన్ల ఇంట్రడక్షన్; వారిద్దరికీ ‘బ్యాక్గ్రౌండ్ చూస్తావా?’ అన్న కామన్ పాయింట్తో ఉన్న కనెక్షన్, ఇంటర్వెల్ బ్లాక్, సెకండాఫ్లో పర్ణశాల గ్రామంలో ఉండే ఓ కొత్తదనమున్న ఫైట్, బ్రహ్మానందం కామెడీ, వినడానికి, చూడ్డానికి బాగున్న పాటలను ప్లస్పాయింట్స్గా చెప్పుకోవచ్చు.
మైనస్ పాయింట్స్ :
ఈ సినిమాకు అసలైన మైనస్ పాయింట్ అంటే కథలో ఎక్కడా కొత్తదనం అన్నదే లేకపోవడం గురించి చెప్పుకోవాలి. హీరో, విలన్ల ఆలోచన విధానాల్లో ఉండే చిన్న కామన్ పాయింట్ మినహాయిస్తే పూర్తి కథ ఇప్పటికే చాలా సార్లు చూసి ఉన్నాం. అలాంటి ఓ సాదాసీదా కథలోనే వచ్చే హీరో-హీరోయిన్ల మధ్యన ప్రేమలో కూడా బలమైన ఎమోషన్ కరువైంది. అల్లు అర్జున్-క్యాథరిన్ల మధ్యన వచ్చే సన్నివేశాలు క్యూట్గానే ఉన్నా, లాజిక్ పరంగా చూస్తే, అవి తేలిపోతాయి. ఇక అల్లు అర్జున్-రకుల్ ప్రీత్ల జర్నీ కూడా లాజిక్ లేనట్టే సాగిపోతుంది. ఈ ఒక్క రెండు అంశాలే కాకుండా సినిమాలో చాలాచోట్ల లాజిక్ అన్న అంశానికి చోటు లేదు.
రెండున్నర గంటలకు పైగా చెప్పాల్సిన స్థాయి ఉన్న కథ కాకపోయినా సినిమాను అంత నిడివిలో చెప్పాలనుకోవడం ఓ మైనస్ పాయింట్గానే చెప్పుకోవాలి. అలాగే మాస్ అనే ఆంశాన్నే పట్టుకొని కొన్నిచోట్ల యాక్షన్ సీన్లలో అతి ఎక్కువ చేసినట్లు కనిపించింది. ఈ క్రమంలో హింస, రక్తం చాలా ఎక్కువయ్యాయి. ఇక ఫస్టాఫ్ స్థాయిలో సెకండాఫ్ లేకపోవడం వల్ల సెకండాఫ్ నుంచి ఎక్కువ ఎక్స్పెక్ట్ చేస్తే నిరుత్సాహం తప్పదు. వ్యవస్థలోని లోపాలను హీరో ఒంటిచేత్తో ఎదుర్కోవడమనే పాయింట్ మాస్ అంశంగా చూస్తే ఫర్వాలేదనిపించినా, ఓవరాల్గా చూస్తే ఇదంతా ఓవర్గా కనిపిస్తుంది. అదీకాకుండా హీరో మిలిటరీ ఉద్యోగాన్ని వదిలేసి ఎందుకు వచ్చాడన్న దానిపై కూడా పూర్తి క్లారిటీ ఉండదు.
సాంకేతిక విభాగం :
సాంకేతిక అంశాల పరంగా చూస్తే, ముందుగా దర్శకుడు బోయపాటి శ్రీను గురించి చెప్పుకోవాలి. బోయపాటి రాసుకున్న కథ పూర్తిగా కమర్షియల్ అంశాలనే నింపుకొని చెప్పుకోవాల్సినంత కొత్తగా ఏమీ లేదు. అయితే ఆ కమర్షియల్ అంశాలనే ప్రధానంగా చేసుకొని బోయపాటి అల్లిన మాస్ ఫైట్స్, కొన్ని ఎమోషనల్ సీన్స్ రచయితగా ఆయన మార్క్ చూపెడతాయి. ఇక దర్శకుడిగా బోయపాటికి ఓ స్పెషల్ మార్క్ ఉంది. ఈ సినిమాలో ఆయన మార్క్ని మళ్ళీ చూడొచ్చు. హీరోయిజంని ఎలివేట్ చేసే సన్నివేశాలతో పాటు కొన్ని ఎమోషనల్ సన్నివేశాల్లోనూ భోయపాటి ప్రతిభను చూడొచ్చు.
ఇక సంగీత దర్శకుడు థమన్ అందించిన పాటలు సినిమాకు హైలైట్స్లో ఒకటిగా చెప్పుకోవచ్చు. ఇప్పటికే పాటలన్నీ సూపర్ హిట్ కాగా, విజువల్స్తో కలిపి చూసినప్పుడు ఆ పాటల స్థాయి మరింత పెరిగిందనే చెప్పాలి. బ్యాక్గ్రౌండ్ మ్యూజిక్ పరంగానూ థమన్ బాగా ఆకట్టుకున్నాడు. రామ్-లక్ష్మణ్ రూపొందించిన ఫైట్స్ సినిమాకు మంచి మాస్ ఫీల్ తెచ్చిపెట్టాయి. రిషీ పంజాబి సినిమాటోగ్రఫీకి ఎక్కడా వంక పెట్టలేం. కోటగిరి వెంకటేశ్వర రావు ఎడిటింగ్ ఫర్వాలేదు. ఎం.రత్నం అందించిన డైలాగ్స్ కూడా బాగున్నాయి. అల్లు అరవింద్ ప్రొడక్షన్ వ్యాల్యూస్ గురించి ఎంత చెప్పినా తక్కువే!
తీర్పు :
తెలుగులో మాస్ సినిమా అంటే ముందే తయారు చేసి పెట్టుకున్న ఓ ఫార్మాట్ ఉంది. అల్లు అర్జున్ని పూర్తి స్థాయి మాస్ హీరోగా పరిచయం చేసే సినిమాగా ప్రచారం పొందిన ‘సరైనోడు’ కూడా అదే ఫార్మాట్ను నమ్ముకొని వచ్చిన మాస్ ఎంటర్టైనర్. ఫార్మాట్ ప్రకారమే సాగే సినిమా అయినా, పొందిగ్గా అల్లిన మాస్ ఎలిమెంట్స్; అదిరిపోయే హీరో, విలన్ల క్యారెక్టరైజేషన్, నటన; వినడానికి, చూడడానికి బాగున్న పాటలు; బన్నీ ఒక పూర్తి స్థాయి మాస్ హీరోగా నిలబడగలనని నిరూపించేలా తనని తాను మలుచుకున్న విధానం లాంటివి ఈ సినిమాకు మంచి ప్లస్ పాయింట్స్గా నిలుస్తాయి. ఇకపోతే కథ మరీ పాతది కావడం, లాజిక్ అన్న అంశానికి సినిమాలో పెద్దగా చోటన్నది లేకపోవడం, కాస్త లెంగ్త్ ఎక్కువవ్వడం లాంటివి ఈ సినిమాకు మైనస్ పాయింట్స్గా చెప్పుకోవాలి. ఒక్కమాటలో చెప్పాలంటే.. ఈ ‘సరైనోడు’, ఏయే అంశాలైతే చెప్పబోతున్నాడని ప్రచారం పొందాడో, ఆయా అంశాలనే చెప్పుకుంటూ వస్తూ ఓ మాస్ పంచ్ ఇస్తూ ఆకట్టుకోవడంలో చాలావరకు విజయం సాధించాడనే చెప్పాలి.